ଭଡ଼ାରେ ରହୁଥିବା ଡାକ୍ତରଙ୍କୁ ଆକ୍ରମଣ କଲେ ଘର ମାଲିକ

ଜଟଣୀ: ଜଟଣୀ ଥାନା ଶ୍ରୀରାମନଗର ଅଞ୍ଚଳରେ ମଙ୍ଗଳବାର ପୂର୍ବାହ୍ନରେ ଜଣେ ଘର ମାଲିକଙ୍କ ଆକ୍ରମଣରେ ଭଡ଼ାରେ ରହୁଥିବା ଡାକ୍ତର ଗୁରୁତର ହୋଇଛନ୍ତି । ଆହତ ଡାକ୍ତର ହେଲେ କୃଷ୍ଣ କୁମାର ମହାନ୍ତି (୮୨) । ଘର ମାଲିକ ଚତୁର୍ଭୁଜ ରାଉଳ ତାଙ୍କୁ ପିତଳ ଢ଼ାଳରେ ଆକ୍ରମଣ କରିଥିବା ଅଭିଯୋଗ ହୋଇଛି । ତାଙ୍କ ମୁଣ୍ଡ ଓ ମୁଖମଣ୍ଡଳରେ ଗଭୀର ଆଘାତ ଲାଗି ପ୍ରବଳ ରକ୍ତସ୍ରାବ ହୋଇଥିଲା ।ଗୁରୁତର ଅବସ୍ଥାରେ ତାଙ୍କୁ ସ୍ଥାନୀୟ ସରକାରୀ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ସୂଚନା ଅନୁଯାୟୀ, ଜଣେ ଅସୁସ୍ଥ ବ୍ୟକ୍ତି ସ୍ୱାସ୍ଥ୍ୟ ସମ୍ବନ୍ଧୀୟ ପରାମର୍ଶ ପାଇଁ ଡାକ୍ତର ମହାନ୍ତିଙ୍କ ପାଖକୁ ଆସିଥିଲେ । ଘର ମୁଖ୍ୟ ଫାଟକ ନିକଟରେ ଅସୁସ୍ଥ ରୋଗୀଙ୍କ ସହ ଡାକ୍ତର ମହାନ୍ତି କଥା ହେଉଥିବା ବେଳେ ଘର ମାଲିକ ଚତୁର୍ଭୁଜ ପ୍ରତିବାଦ କରିଥିଲେ । ତାଙ୍କ ଘରକୁ କେହି ଅସୁସ୍ଥ ବ୍ୟକ୍ତି ନଆସିବା ପାଇଁ କହିଥିଲେ । ଏହାକୁ ନେଇ ଡାକ୍ତରଙ୍କ ସହ ତାଙ୍କର ଯୁକ୍ତିତର୍କ ହୋଇଥିଲା । ଚତୁର୍ଭୁଜ ଧରିଥିବା ଏକ ପିତ୍ତଳ ଢାଳରେ ଡାକ୍ତରଙ୍କୁ ଆକ୍ରମଣ କରିଥିଲେ ।ସେଠାରେ ଉପସ୍ଥିତ ଅସୁସ୍ଥ ବ୍ୟକ୍ତି ଓ ଘରୁ ଡାକ୍ତରଙ୍କ ପୁଅ ବାହାରି ଆସି ହସ୍ତକ୍ଷେପ କରିବା ପରେ ଘରମାଲିକ ପଳାଇଥିଲେ । ଅପରପକ୍ଷେ ଘର ମାଲିକ ମଧ୍ୟ ଡାକ୍ତର ମହାନ୍ତି ଓ ତାଙ୍କ ପୁଅ ନାମରେ ପାଲଟା ଅଭିଯୋଗ କରିଛନ୍ତି । ଘରମାଲିକ ଜଣେ ଅବସରପ୍ରାପ୍ତ ପ୍ରଶାସନିକ ଅଧିକାରୀ । ଉଭୟ ପକ୍ଷର ଏତଲାକୁ ଭିତ୍ତି କରି ପୁଲିସ ଦୁଇଟି ମାମଲା ରୁଜୁ କରିଛି । ଘରମାଲିକଙ୍କୁ ଥାନାରେ ଅଟକ ରଖିଛି ।