ଏବେ ନୂଆମୋଡ ନେଇଛି ଅଭିନେତା ସୁଶାନ୍ତ ସିଂହରାଜପୁତ ମୃତ୍ୟୁ ଘଟଣା

ମୁମ୍ବାଇ: ବହୁଚର୍ଚ୍ଚିତ ବଲିଉଡ୍ ଅଭିନେତା ସୁଶାନ୍ତ ସିଂହରାଜପୁତ ମୃତ୍ୟୁ ଘଟଣା ଏବେ ନୂଆମୋଡ ନେଇଛି । ସୁଶାନ୍ତଙ୍କୁ ହତ୍ୟା କରାଯାଇଥିବା ଅଭିଯୋଗକୁ ଆଧାର କରି ତଦନ୍ତ କରୁଥିବା ସିବିଆଇ ଏବେ ଛାନଭିନର ଦିଗବଦଳାଇ ଦେଇଛି । ସୁଶାନ୍ତଙ୍କୁ ହତ୍ୟା କରାଯାଇଥିବା ନେଇ କୌଣସି ସୁରାକ ନ ମିଳିବାରୁ ଏବେ ତଦନ୍ତର ଦିଗ ୩୦୬ ଦଫା ଅର୍ଥାତ ଆତ୍ମହତ୍ୟା ପାଇଁ ଉସକାଇବା ଦିଗକୁ ନେଇ ଛାନଭିନ ଆରମ୍ଭ କରିଛି । ଏନେଇ ସୁଶାନ୍ତଙ୍କ ପରିବାର ଲୋକଙ୍କ ସହ ତଦନ୍ତ ପରିସରର୍ଭୃକ୍ତ ଥିବା ବ୍ୟକ୍ତି ବିଶେଷଙ୍କୁ ପଚରାଉଚରା କରିବା ସମ୍ଭାବନା ରହିଛି ବୋଲି ସିବିଆଇର ଜଣେ ବରିଷ୍ଠ ଅଧିକାରୀଙ୍କ ସୁତ୍ରରୁ ଜଣାପଡିଛି ।
ସୂଚନା ଅନୁସାରେ, ସୁଶାନ୍ତ ସିଂହ ରାଜପୁତ ମାମଲାରେ ସିବିଆଇକୁ ଏପର୍ଯ୍ୟନ୍ତ ହତ୍ୟାର କୌଣସି ପ୍ରମାଣ ମିଳିନାହିଁ । ସିବିଆଇ ଏବେ ଆତ୍ମହତ୍ୟା ଦିଗ ଉପରେ ଗୁରୁତ୍ୱ ଦେଉଛି । ସୁଶାନ୍ତଙ୍କୁ ଆତ୍ମହତ୍ୟା କରିବାକୁ କିଏ ଉସକାଇଛି, ନା ସେ ମାନସିକ ଭାରସାମ୍ୟ ହରାଇ ଏଭଳି କରିଛନ୍ତି, ସେ ନେଇ ସିବିଆଇ ତଦନ୍ତକୁ ତ୍ୱରାନ୍ୱିତ କରିଛି । ତେବେ ଏହି ମାମଲାରେ ରିୟା ଚକ୍ରବର୍ତୀ ଏତଲା ଦେଇଥିବା ବେଳେ ସୁଶାନ୍ତଙ୍କ ପରିବାର ପକ୍ଷରୁ ମଧ୍ୟ ଅଭିଯୋଗ କରାଯାଇଛି । ସୁଶାନ୍ତଙ୍କ ପରିବାର ଲୋକ ରିୟାଙ୍କ ବିରୋଧରେ ଆତ୍ମହତ୍ୟା ପାଇଁ ଉସକାଇବା ଅଭିଯୋଗ ଆଣିଥିବା ବେଳେ ରିୟା ମଧ୍ୟ ସମାନ ଅଭିଯୋଗ ସୁଶାନ୍ତଙ୍କ ପରିବାର ବିରୋଧରେ ଆଣିଛନ୍ତି । ତେବେ ସିବିଆଇ ଏନେଇ ଉଭୟଙ୍କୁ ପଚରାଉଚରା କରିବ ବୋଲି ଜଣାପଡିଛି ।

ସେହିପରି ସିବିଆଇକୁ ଶବ ବ୍ୟବଚ୍ଛେଦର ସମ୍ପୂର୍ଣ୍ଣ ରିପୋର୍ଟ ଓ ଭିସେରା ଫରେନସିକ ରିପୋର୍ଟ ହସ୍ତାନ୍ତର କରାଯାଇଛି । ସିବିଆଇ ଓ ଏକ ବିଶେଷଜ୍ଞ ଟିମ ଉକ୍ତ ରିପୋର୍ଟକୁ ତନ୍ନତନ୍ନ କରି ଯାଂଚ କରୁଛନ୍ତି । ରିପୋର୍ଟରେ କ’ଣ ରହିଛି, ତାହା ସ୍ପଷ୍ଟ ଭାବେ ଜଣାପଡିନଥିବା ବେଳେ ହତ୍ୟା ନେଇ କୌଣସି ସୁରାକ ମିଳୁନଥିବା କୁହାଯାଉଛି । ତେବେ ସିବିଆଇ ଘଟଣାକୁ ଗମ୍ଭିରତାର ସହ ନେଇ ଛାନିଭିନ କରୁଥିବା ବେଳେ ଖୁବଶୀଘ୍ର ରହସ୍ୟ ଖୋଲିବ ବୋଲି ଆଶା ରଖିଛି ।
ଉଲ୍ଲେଖଥାଉ କି, ସୁଶାନ୍ତ ସିଂ ରାଜପୁତ ମୃତ୍ୟୁକୁ ନେଇ ସାରଦେଶରେ ଚର୍ଚ୍ଚା ଜୋର ଧରିଛି । ମୁମ୍ବାଇ ଓ ବିହାର ପୁଲିସ ଘଟଣାର ତଦନ୍ତ କରୁଥିବା ବେଳେ ଉଭୟଙ୍କ ମଧ୍ୟରେ ସମନ୍ୱୟ ନରହିବା ଓ ଦୁଇ ରାଜ୍ୟ ପୁଲିସ ମୁହାଁମୁହିଁସ୍ଥିତିକୁ ଆସିବା ମାମଲାକୁ ଆହୁରି ବିବାଦୀୟ କରିଦେଇଛି । ତେବେ ଘଟଣାର ଗମ୍ଭିରତାକୁ ଦେଖି ମାମଲାର ତଦନ୍ତ ସିବିଆଇକୁ ହସ୍ତାନ୍ତର କରାଯାଇଛି । ଅପରପକ୍ଷରେ ସୁଶାନ୍ତଙ୍କ ମୃତ୍ୟୁ ମାମଲାର ତଦନ୍ତ ଚାଲିଥିବା ବେଳେ ଡ୍ରଗ୍ସ ଲିଙ୍କର ସୁରାକ ମିଳିଥିଲା । ପରେ ଏନସିବି ଘଟଣାର ତଦନ୍ତ କରି ରିୟା ଚକ୍ରବର୍ତୀଙ୍କ ସହ ଏକାଧିକଙ୍କୁ ଗିରଫ କରିଛି । ଏଥିସହିତ ପ୍ରିୟଙ୍କା ଚୋପ୍ରାଙ୍କ ସହ ୧୦ରୁ ଅଧିକ ଅଭିନେତ୍ରୀଙ୍କୁ ଏନସିବି ନୋଟିସ ଜାରି କରିଥିବା ଜଣାପଡିଛି । ଯାହା ଏବେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି