‘ତୁମ କ୍ରିକେଟ ଖେଳକୁ ସମସ୍ତେ ମନେରଖିବେ। ଭାରତୀୟ ସେନା ପାଇଁ ତୁମ ଭୂମିକା ଗୁରୁତ୍ୱପୂର୍ଣ୍ଣ’, ମାହିଙ୍କୁ ପ୍ରଧାନମନ୍ତ୍ରୀଙ୍କ ଭାବବିହ୍ୱଳ ବାର୍ତ୍ତା

ଭାରତକୁ ଦୁଇଥର ବିଶ୍ୱ ଚାମ୍ପିଅନ କରିଥିବା ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀ ନିକଟରେ ଅନ୍ତର୍ଜାତୀୟ କ୍ରିକେଟକୁ ଅଲବିଦା କହିସାରିଛନ୍ତି । ସେ ଅଗଷ୍ଟ ୧୫ ତାରିଖରେ କ୍ରିକେଟରୁ ଅବସର ଘୋଷଣା କରିଛନ୍ତି । ଧୋନୀଙ୍କ ଅବସର ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପତ୍ରଲେଖି ମାହିଙ୍କ ଉପଲବ୍ଧିକୁ ପ୍ରଶଂସା କରିଛନ୍ତି ।

ମହେନ୍ଦ୍ର ସିଂ ଧୋନୀ ମଧ୍ୟ ମୋଦୀଙ୍କୁ ଟ୍ୱିଟରରେ ଧନ୍ୟବାଦ ଜ୍ଞାପନ କରିଛନ୍ତି । ଧୋନୀ ଟ୍ୱିଟ୍ କରି ଲେଖିଛନ୍ତି ଯେ, ଜଣେ କଳାକାର, ସୈନିକ ଓ ଖେଳାଳିଙ୍କୁ ପ୍ରଂଶସା କରାଯାଏ । କିନ୍ତୁ ସେମାନଙ୍କର ପରିଶ୍ରମ ଓ ବଳୀଦାନୁ ସମସ୍ତେ ଚିହ୍ନିବା ଆବଶ୍ୟକ । ଏହାସହ ସେ ପତ୍ର ପାଇଁ ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ମଧ୍ୟ ଜଣାଇଛନ୍ତି  ।

ମୋଦୀ ପତ୍ରରେ ଉଲ୍ଲେଖ କରିଥିଲେ ଯେ, ଆପଣଙ୍କଠାରେ ନୂଆ ଭାରତର ଆତ୍ମା ପ୍ରତିଫଳିତ ହେଉଛି । ଆପଣଙ୍କଠାରେ ଯୁବକଙ୍କ ଭାଗ୍ୟ ଓ ପରିଚୟ ସେମାନଙ୍କ ପରିବାର ନିର୍ଣ୍ଣୟ କରିନଥାଏ । ବରଂ ଏହି ଯୁବକମାନେ ନିଜେ ନିଜର ପରିଚୟ ହାସଲ କରିଥାନ୍ତି । ଧୋନୀଙ୍କ ଅବସର ପରେ ୧୩୦ କୋଟି ଭାରତୀୟ ନିରାଶ ହୋଇଛନ୍ତି । ଧୋନୀ ଜଣେ ମହାନ ଖେଳାଳି ଓ ଅଧିନାୟକ । ଇତିହାସରେ ତାଙ୍କ ନାମ ଲିପିବଦ୍ଧ ହୋଇରହିବ । ସେ ଜଣେ ଭଲ ଓ୍ୱିକେଟ କିପର୍ । ସେ ଦଳ ପାଇଁ ଅନେକ କିଛି ତ୍ୟାଗ କରିଛନ୍ତି । ଧୋନୀଙ୍କ ଖେଳକୁ ସମସ୍ତେ ମନେ ରଖିବେ । ସେନାରେ ମଧ୍ୟ ସେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛନ୍ତି ।

ମୋଦୀ ଆହୁରି ଲେଖିଛନ୍ତି ଯେ, ଧୋନୀଙ୍କ ଖେଳୁଆଡ ମନୋଭାବ ସତରେ ବିରଳ । ଏକ ଛୋଟ ସହରରୁ ସେ ସାରା ବିଶ୍ୱରେ ପ୍ରସିଦ୍ଧି ଲାଭ କରିଛନ୍ତି । ଭାରତ ପାଇଁ ଗର୍ବ ଆଣିଛନ୍ତି । ଏପରିକି ହେୟାର ଷ୍ଟାଇଲରେ ଯାହା ପରିବର୍ତ୍ତନ କରିଥିଲେ ସର୍ବଦା ଥଣ୍ଡା ମିଜାଜରେ ଖେଳିଛନ୍ତି । ଏହାସହ ଧୋନୀ ଅବସର ପରେ ସାକ୍ଷୀ ଓ ଜୀଭାଙ୍କ ସହ ଅଧିକ ସମୟ ବିତାଇବେ ବୋଲି ମୋଦୀ ପତ୍ରରେ ଉଲ୍ଲେଖ କରିଛନ୍ତି ।